حبة الفراولة #9

الحلقة التاسعة

-----------------

تدخل حسناء الى غرفتها و تلقى بجسدها الى السرير .. و تتذكر كل ما حدث فى السنوات الماضية ....

حسن : حسناء انا عايز اطلب منك طلب ..

حسناء : ايه ؟؟

حسن : ممكن ننسى كل حاجة ف حياتنا , عالاقل النهاردة بس , انا مبسووط اووى انى معااكى و مش عايز احس غير بيكى انتى وبس , و كمااان نفسى اسمعك بتقوليلى حبيبى ..

حسناء : حسن من فضلك .. احنا قولنا مش هنتكلم ف الموضوع ده تانى .. صح ؟

حسن : النهاردة بس يا حبيبتى , اعتبريه اخر يوم ف حياتى و عايزك تحققيلى كل اللى بتمناه

حسناء : بعد الشر عليك .. ما تقولش كدة تانى , ربنا يجعل يومى قبل يومك يا حبيبى

حسن : ياااااااااااااااااه .. انا بعد الكلمتين دول عندى استعداد اموت دلوقتى

حسناء : الله .. تانى .. مش قولنا بلاش الكلام ده , ما تضايقنيش بقي

حسن : طيب خلاص مش هقول كدة تانى .. ينفع اقول بحبك ؟

حسناء : احم ... لا

حسن : طيب بموت فيكى

حسناء : الله .. ما قولنا لا

حسن : طيب خلاص .. هسكت اهو

حسناء : شاطر

حسن : حسناء .... بحبك

تستيقظ حسناء من غفوتها و تتنهد ثم تبكى فى صمت و هى تحتضن الوسادة

-----------------

بعد ان يغادر حسن النادى , يأخذ سيارته ليقودها بعيدا الى حيث لا يدرى , حتى قادته وحدته الى كافيه صغير بجانب الشركة التى كان يعمل بها , لم يتردد و ترك السيارة و دخل الى ذلك الكافيه . و طلب فنجانيين قهوة .

جلس فى شرود , و داهمته الذكريات

حسن : اتنين قهوة لو سمحت

حسناء : هههههههههه تحس اننا حافظين بنطلب ايه , احنا مش كنا لسة بنقول امبارح اننا هنقلل القهوة و هنطلب عصير ؟

حسن : ااه صحيح , تصدقى نسيت

حسناء : ايه اللى واخد عقلك ؟

حسن : انتى , انتى ملكتى عقلى و روحى و قلبي

حسناء :  ................ ( ابتسامة مع انحناء قليل بالرأس يعبر عن كسوفها )

حسن : انا بموت فيكى  , و ما ااقدرش اعيش من غيرك

حسناء : بس بقي يا حسن , انا مش عارفة اقول ايه

حسن : ما تقوليش اى حاجة , قلبك بيتكلم

حسناء : احم .. خلاص بقى كفاية الكلام ده انا قلبي هيوقف

حسن : سلامة قلبك يا روحى

يأتى الرجل ليضع فنجانيين القهوة و هو فى قمة استعجابه فيعود حسن من شروده ليساله النادل

( هو حضرتك منتظر حد ؟ )

حسن : لآ , شكرا ليك

النادل : العفو

يأخذ حسن رشفة من كلا الفنجانين , و يدفع الحساب و يغادر سريعا ..

-------------------------

ما أصعب الحب حين يصبح الاعتراف به شيئا مستحيلا , و لكن ربما تعترف القلوب بما لا تهوى العقول  

كيف بدأ ذلك الحب و كيف استمر ؟ , ما الذى حدث حتى يفرق الحب بين القلوب و يقرب العقول , اعتدنا ان الحب متصل بالقلب لا العقل , و لكن تلك المرة الوضع مختلف , فقررت الحياه ان تباعد بين قلوبهم ليحكم صوت العقل و يقرر الصداقة بدلا من الحب , قرار صعب جدا على كلا الطرفين , و لكنها الطريقة الوحيدة التى ستجعل حديثهما متاحا ..

حسناء : مبروك

حسن : ......

حسناء : ايه الصمت ده ؟ , بقولك مبروك , قولى عقبالك .. اى حاجة يعنى .. و لا ايه يا ماجد ؟

ماجد : عندك حق يا حسناء , مش عارف انا ايه العريس ده , يا بنى ما تضحك شوية , ده النهاردة فرحك

حسن : عارف , بس ايه , لازم نتجنن يعنى عشان هنتجوز ؟

حسناء : آه , لازم عالاقل تكون مبسوط و طاير من الفرحة انك هتتجوز الانسانة الى بتحبك و بتحبها , و الجنان ف الحالة دى شئ طبيعى , صح و لا ايه ؟

حسن : آه صح , عندك حق

ماجد : فى ايه انتوا الاتنين هتقلبوها نكد كدة ليه ؟؟

حسن : ولا نكد و لا حاجة , ده واقع

ماجد : جرا ايه يا عم حسن ؟ , ده قرارك انت و لا انت هترجع ف كلامك دلوقتى , لو مش عايز تتجوزها خلاص , محدش ضربك على ايدك

حسناء : ايه الكلام اللى انت بتقوله ده يا ماجد , بدل ما تخليه يضحك و يبقي مبسوط بتقوله كدة

حسن : بيقول الكلام الصح , انا بحب هالة , و هى بتحبنى , و اللى مضايقنى ف الوضع ده هو انتى

حسناء : انا ايه ؟ , انا كويسة على فكرة و مفيش اى حاجة تخليك تتضايق

حسن : ما هو ده اللى مضايقنى , انك كويسة و بتضحكى و بتهزرى و لا كانه فرحنا احنا

حسناء : طيب ما هو فرحك هو فرحى ولا ايه ؟ , و بعدين ما انا قولتلك طول ما انت مبسوط انا هكون مرتاحة و مبسوطة ..

حسن : كفاية بقي .. كفاية تعذبينى بالكلام ده .. انتى ليه بتعملى كدة ؟؟

حسناء : عشان دى الحقيقة , و الله انا ما زعلانة منك و لا اى حاجة , انا بحبك ااه بس احنا مش لبعض , احنا اتفقنا اننا هنبقي اصحاب و اخوات طول العمر , و مش هنخلى اى حاجة تفرق بينا , و انا اللى هوصلك فرحك بنفسى , و مراتك هتكون اختى , هالة بتحبك اوى , هى طيبة و جدعة و تستاهل كل خير , تستاهل انك تحبها اوى و ما تستغناش عنها , و بعدين انت وعدتنى انك هتكون مبسوط ف حياتك , و الا هنخلى حياتك ترجع زى الاول من غيرى , و ما نعرفش بعض تانى ..

حسن : خلاص يا حسناء , خلاص ..

حسناء : طيب ممكن تضحك بقي , و كفايانا نكد , انا هروح اشوف هالة ف الاوضة بتاعتها , و انت خلص مش لازم تتزوق كل ده يعنى

حسن : حسناء ... ربنا يخليكى ليا

-------------------------

تجلس هالة بشقتها منتظرة حسن , و بعد ساعات من التفكير و البكاء , تشعر بألم شديد , و يزداد بكائها , تحمل هاتفها و تتصل بحسن و لكن دون جدوى , ثم تفكر قليلا فتتصل بـ حسناء , فتجيب حسناء سريعا ..

حسناء : الو ..

هالة : حسناء .. انا تعبانة اووى .. عايزاكى حالا

حسناء : طيب ايه اللى حصل ؟؟

هالة : مش عارفة .. آآآه

حسناء : طيب انا جاية حالا ....

تصل حسناء الى شقة هالة , و تتصل بالمستشفى ... و بعد ان تعلم ان حسن لا يجيب على اتصالات هالة .. ترسل اليه  رسالة نصية ...

" حسن .. انا كنت غلطانة .. انت ........

يتبع ...

حبة الفراولة #8

الحلقة الثامنة

* * * * *  *

وفاء : لو مش عايزة تحكيلى بلاش , بس عايزة اقولك بلاش تظلمى نفسك , فكرى ف نفسك شوية يا حسناء عشان ترتاحى , اوعى تقاومى احساسك عشان ما تندميش بعد كدة

حسناء : انا هحكيلك كل حاجة , بس اوعدينى ان احمد ما يعرفش اى حاجة من اللى هقولهالك ..

وفاء : ما تقلقيش يا حسناء , عمره ما هيعرف

و تحمل حسناء الورقة و تمد يدها الى وفاء ...

حسناء : الاول اقرى الورقة دى ..

تحمل وفاء الورقة و تبدأ فى قرائتها ...

" خليك جمبها , انا همشى , بس لازم تعرف انى مش السبب ف اللى هيا فيه , السبب ف اللى هيا فيه هو انت , و هيا كمان السبب ف ده , انت بتحبها و هيا بتموت فيك و محاولاتكوا انكوا تبعدوا عن بعض كانت فاشلة جدا لان مهما حاولتوا ده مش بايدكوا و محدش ف الدنيا بيسيطر على قلبه , انا ما جرحتهاش , أسألها انا قولتلها ايه ف النادى و خليك متاكد انى ما قولتش غير الحقيقة , بس انا مراتك بردو بالرغم من كل حاجة ,خليك معاها و ما تسيبهاش لوحدها ده اكتر وقت هيا محتجاك فيه جمبها حتى لو هيا رفضت ده , حسناء بتحبك بجد , ومستعدة تديك حياتها كلها لو طلبتها , و انت كمان بتحبها جدا و الا ما كنتش غلط ف اسمى كل مرة بنكون سوا , انا هبعد و لما تعرف تفكر و تقرر كلمنى "

وفاء : مين اللى كاتبة الكلام ده بقي ؟

حسناء : دى هالة , مرات حسن اللى المفروض انى بحبه

وفاء : انتى اتجننتى يا حسناء ؟ , بتحبى واحد متجوز ؟!

حسناء : لا انا مش بحب واحد متجوز , انا كنت بحب زميلة ف الشغل و ما اتكلمتش و لا قولتله لانى عارفة ان علاقتنا مستحيلة , بس مش ذنبى ان هو كمان كان بيحبنى , انا عمرى ما طلبت منه انه يحبنى او انه يكون معايا , انا لما عرفت انه بيحبنى بعدت عنه , احنا ف مصر يعنى مفيش اتنين يبقوا اصحاب و هما بيحبوا بعض .

وفاء : انا مش فاهمة حاجة خالص !!

حسناء : هفهمك من الاول ....

يدخل احمد الى الغرفة و يجلس بجوار حسناء , فتصمتا حسناء  و وفاء و ينظران الى بعضهما .

احمد : هاه يا حبيبتى , انتى احسن دلوقتى ؟

حسناء : الحمدلله يا حبيبى انا كويسة , بس حاسة انى عايزة انزل اتمشى لوحدى شوية

احمد : تنزلى لوحدك ازاى يعنى ؟ , انتى لسة تعبانة يا حسناء وانا خايف عليكى

حسناء : معلش يا احمد سيبنى براحتى عايزة اشم شوية هوا , هنزل بالعربية شوية و هرجع بسرعة

احمد : لا يا حسناء , عشان خاطرى عالاقل مش النهاردة , انتى لازم ترتاحى .

حسناء : حاضر يا احمد , خلاص انا هنام دلوقتى و ابقي انزل بكرة

احمد : ماشى يا حبيبتى , انا هكون ف الاوضة انا و وفاء , لو عايزة اى حاجة نادى عليا بس

حسناء : تمام

احمد : تصبحى على خير .

-------------------------

تستيقظ حسناء فى الصباح الباكر فتحمل هاتفها و تتصل بهالة و تتفق معها ان تلتقيان فى النادى بعد ساعة بالضبط .

و تتصل بحسن و تخبره ان يقابلها فى النادى بعد ذلك بنصف ساعة .

ترتدى ملابسها و تحمل نفسها الى النادى , و تكون هالة فى انتظارها , تجلسان و تبدءان الحديث

هالة : حمدلله على سلامتك .

حسناء : الله يسلمك يا هالة , انا مش عارفة اقولك ايه .. بس ...

هالة : ما تقوليش اى حاجة , انا كل كلمة قولتها كنت فعلا قاصداها , و دى الحقيقة سواء تقبلتيها او لا .

حسناء : بس انا مش عايزة كدة , حسن جوزك , و دى حاجة مش هتتغير , مش هنكر انه كان ف يوم من الايام فى حاجة بينا , بس صدقينى من ساعة جوازكواا و الحاجة دى اختفت ما بينا , و انا عمرى ما ف يوم جرحتك و لا خونتك , و انا كنت هقولك كل حاجة بس خوفت انك ما تتفهميش الوضع ساعتها , و لما الموضوع خلص قولت مالهاش لازمة .

هالة : مالهاش لازمة !! , حسناء .. احنا مش هنتكلم عنى , انا خلاص عرفت مصيرى , المهم انتى , هيكون ايه مصيرك ؟ , انا عارفة ان انتوا ...

حسناء : لا يا هالة , اللى انتى بتقوليه ده مستحيل , انا عرفت مصيرى خلاص , و انا مرتاحة كدة , مش عايزة حاجة تانية غير اننا نفضل اصحاب انا و انتى , حتى لو مش هكلمه تانى معنديش مشكلة , بس انا مش هخسرك يا هالة .

هالة : انتى لسة بتفكرى فيا بعد كل ده ؟؟ , بعد كل اللى قولتهولك ؟ , بس لو احنا صحاب زى ما انتى بتقولى يبقي انتى كمان ليكى حقوق عليا و اا مش هقبل بكدة

حسناء : ده قرارى يا هالة , و انا و الله مرتاحة كدة , عشان خاطرى و عشان خاطر الطفل اللى بينكوا 

هالة : و انتى يا حسناء ؟ ...

حسناء : ما تقلقيش عليا , اغنا هسافر فترة مع اخويا عشان مش هقدر اقعد لوحدى هنا , هروح اسكندرية , بس اكييد هرجع تانى , محدش بيستغنى عن حياته كلها مرة واحدة ولا ايه ؟

هالة : انتى متأكدة من قرارك ده ؟

حسناء : الحمدلله , حسن جاى دلوقتى , اتكلمى معاه , انا مش همشى الا و انتوا الاتنين مع بعض و ترجعوا زى الاول عشان اللى ف بطنك

هالة : تفتكرى ان انا ف دماغه اصلا ؟! , ده حتى لسة ما يعرفش ان انا حامل

حسناء :انتى لسة مش قولتيلة ؟

هالة : كنت ناوية اقوله ف النادى , بس بعدها حصل اللى حصل .

حسناء : خلاص انا هحل الموضوع , ما تقلقيش , و خدى بالك من جوزك و بيتك .

هالة : و انتى اوعدينى انك تاخدى بالك من نفسك .

و يأتى حسن فى اتجاههما ... يمد يده اليهما تباعا

حسن : حسناء .. ازيك ؟

حسناء : الحمدلله كويسة

حسن : عاملة ايه يا هالة ؟؟

هالة : الحمدلله

حسناء : حسن انا خمس دقايق و همشى عشان كدة اقعد و اسمع الكلام اللى هقوله من غير ما تقاطعنى لو سمحت

حسن : خير يا حسناء , قولى .

حسناء : حسن .. افتكر وعدك ليا , افتكر الوعد اللى اخدنا سوا , الى حصل الفترة اللى فاتت ده نمحيه من حياتنا , كانه ما حصلش اصلا , و نرجع زى الاول , اصحاب , و تهتم بمراتك و بيتك و توعدنى انك تكون مبسوط ف حياتك

حسن : و انتى .......

حسناء : من فضلك ما تقاطعنيش و سيبنى اكمل ..

حسن : اتفضلى ...

حسناء : انا هسافر اسكندرية الفرة الجاية و هرجع ان شاء الله على ميعاد و لادة هالة .

حسن : ولادة هالة ؟!!!

حسناء : ااه , هالة حامل , ان شاء الله تجيبلى بيبى صغير يقولى يا خالتو , صح يا هالة ؟

هالة : ان شاء الله يا حسناء

حسن : و انا اخر من يعلم ؟؟

هالة : انت الفترة اللى فاتت ما سالتش حتى عليا , هتعرف منين ؟

حسناء : خلاص يا هالة الموضوع عدى و كل حاجة هترجع زى الاول

حسن : ايه اللى انتى بتقوليه ده يا حسناء ؟؟ , كل حاجة هترع زى الاول ؟؟ و انتى ؟؟ انتى فين من كل ده ؟

حسناء : انا زى ما انا يا حسن , مفيش اى حاجة اتغيرت , هسافر كام شهرو هرجع ان شاء الله , هرجع اقوى من الاول .

حسن : بس انا مش عايزك تبعدى , انا عايزك معايا .. انا ....

حسناء : حسن ... من فضلك , بلاش تحكم عليا انى ابعد و ما نعرفش بعض تانى خالص

حسن : بس مش ده اللى انا عايزه

حسناء : لو فضلت تتكلم كدة انا هبعد ومش هتعرفنى تانى , كفاية بقي , انا مش ناقصة

هالة : حسن , لو عايزنى امشى دلوقتى انا همشى بس انا كمان لو مشيت مش هرحع تانى

حسن : انتوا اتفقتوا عليا يعنى ؟؟ , كل واحدة فيكواا عايزة تمشى و ما ترجعش تانى ؟؟ , طيب و ليه كل ده ؟؟ واضح ان انا سبب المشكلة , ايه رايكوا ابعد انا عنكوا انتوا الاتنين ؟ , هترتاحوا ؟؟  .. عن اذنكواا .

هالة : حسن ........

حسناء : سيبيه يا حسناء , هيهدى و يبقى كويس , هو لازم يفكر ف كل حاجة و يعرف انه غلطان ف حق نفسه

هالة : خايفة اووى عليه يا حسناء

حسناء : ( مش هيبقى اكتر من قلقى عليه ) ... ما تقلقيش هو هيبقي كويس , انا لازم امشى بقي , تعالى اوصلك ف طريقى

هالة : لا انا معايا العربية , ابقي طمنينى عليكى

حسناء : حااضر , و انتى كمان , خدى بالك من نفسك و من البيبى , و اكيد مش هوصيكى على حسن

هالة : ما تقلقيش

--------------------------------------------------------------

تعود حسناء الى منزلها , و تكون وفاء بانتظارها ..

وفاء : هاه ؟؟ ,, عملتى ايه ؟؟

حسناء : خلاص الموضوع خلص , محدش هيتكلم فيه تانى

وفاء : مش فاهمة ؟!!!

حسناء : هفهمك بليل , انا عايزة اروح اسكندرية
وفاء : بجد ؟؟ , يعنى هترعى معانا ؟؟

حسناء : ااه , و هسمع الكلام و هقعد معاكوا

وفاء : طيب الحمدلله , انتى عارفة ان الوضع كان صعب بين هنا و هناك عشان مدرسة حسناء كمان , بس كل ده عشان تبعدى عن حسن ؟؟ !!

حسناء : ااه كدة احسن

وفاء : بس انتى بتحبيه اوى يا حسناء

حسناء : كنت ... كنت بحبه , انا هدخل ارتاح شوية و لما يجى احمد صحينى

وفاء : طيب يا حبيبتى

تدخل حسناء الى غرفتها و تلقى بجسدها الى السرير .. و تتذكر كل ما حدث فى السنوات الماضية ....

حسن : حسناء انا عايز اطلب منك طلب ..

حسناء : ايه ؟؟

حسن : ممكن ننسى كل حاجة ف حياتنا , عالاقل النهاردة بس , انا مبسووط اووى انى معااكى و مش عايز احس غير بيكى انتى وبس , و كمااان .......

يتبع ....