حبة الفراولة #14

الحلقة الرابعة عشر

* * * * * * * * * * 

فى غرفة ما , حسناء مقيدة و نائمة على السرير و موضوع حول فمها شريط لاصق يمنعها من الكلام , هناك آثار دماء على رأسها تبدو كأنها نتيجة ضربة شديدة على الرأس ...

تنظر حولها و تحاول ان تتحرك , تسمع اصوات لا تميزها , اصوات رجال غليظة ثم تسمع صوت تعرفه جيدا , تحاول ان تتذكر ما حدث تشعر بألم شديد فى رأسها .. فتتآواااه

ـ انت ازاى تتعمل كدة ؟! لو جراالها حاجة مش هرحمكوا

ـ يا عم احنا جبناها زى ما انت قولت , هيا بس عصلجت معانا شوية و فضلت تصرخ , و بعدين دى خبطة صغيرة يعنى

ـ انا قولتلكوا محدش يمس شعرة منها , تقوم ضاربها على راسها

ـ يا عم ما قالك خلاص , ما هى كويسة و بتتنفس جوا , احنا عملنا اللى طلبته مننا , ادينا باقى حسابنا و خلينا نمشى

ـ اتفضل باقى فلوسكوا اهى , مش عايز اشوف وشكوا الفترة ى خالص , تختفوا ولو اى حد عرف حاجة انتوا عارفين انا ممكن اعمل ايه

ـ يا عم خلاص , خلصت الحكاية , سلام

ـ غوروا ف داهية

و تسمع حسناء صوت ارتطام الباب بشدة , و خطوات تقترب من باب الغرفة ليتحرك مقبض الباب .. و يقف امامها حسن فتنظر له فى خوف شديد و هى فى قمة الاستغراب فهى لم تتوقع ابدا ان يكون حسن هو من فعل ذلك .. يقترب منها حسن و تبدو على ملامحه آثار القلق و الخوف على حسناء . . يزيل الشريط اللاصق من على فمها , ويمسك يدها

حسن : حبيبتى , انتى كويسة ؟

حسناء : حسن .. انت ... ازاى ؟!!

حسن : كنتى عايزانى اسيبك تتجوزى حد تانى ؟ , انا ما اقدرش استحمل اشوفك ف حضن واحد تانى .

حسناء : لا انت اتجننت بجد , انت مش طبيعى

حسن : اتجننت بحبك , مجنون بيكى , ازاى عايزانى ابقي طبيعى

حسناء : فكنى , عايزة امشى من هنا

حسن : عايزة تمشى و تسيبينى ؟ , انا ممكن اموت لو بعدتى عنى

حسناء : انت متخيل انت عملت ايه ؟ , انت خطفتنى يوم فرحى , ما فكرتش ف البنى آدم اللى هتجوزه ؟ , ف اخويا الى اكيد قلقان عليا ؟ , ف ابنك و مراتك ؟

حسن : ازاى افكر و انا سايب قلبي و عقلى معاكى .. انا ما اقدرش ابعد عنك يا حسناء , انا بحبك

حسناء : و انا مش بحبك , سيبنى ف حالى بقي , حاولت كتير ابعدك عن حياتى , ابعد نفسى عنك , ابعد عن حبك , عن حياتك , ليه مصر انك تعذبنى

حسن : انا اسف يا حبيبتى , انا اسف .. مش قصدى انى اعذبك , انا بحبك و عايزك معايا عشان حياتى من غيرك عذاب

حسناء : بتحبنى ؟ , حب ايه ده اللى يخليك تعمل كدة ؟ , تجيب ناس يخطفونى و يضربونى ؟؟

حسن : انا اسف يا حياتى , بس مكنش فى حل غير كدة

حسناء : فكنى يا حسن انا ايدى وجعتنى مش قادرة

حسن : حاضر يا حبيتى معلش , كانت اتقطعت ايدهم قبل ما يربطوكى

يبدأ حسن فى فك قيد حسناء فتتآآواه و تشعر بالم شديد , يضع حسن يده على وجهها و ينظر مليا الى عيناها

حسناء : دماغى وجعانى اوى , حاسة بصداع جامد

حسن : معلش يا روح قلبي , هنضفلك الجرح دلوقتى و هجيبلك مسكن

تمسك حسناء يده و هو فى طريقه الى خارج الغرفة .. فيتوقف و يتراجع

حسناء : انا عايزة امشى , اخويا اكيد قلقان عليا , انا ما ينفعش افضل هنا

حسن : انا مش هسيبك يا حسناء , عشان خاطرى ما تبعديش عنى .. انا هموت من غيرك

حسناء : يا حسن اللى انت بتعمله ده غلط احنا مش لبعض بلاش نتحدى القدر , بلاش نغلط و نندم على حبنا لبعض

حسن : عايزة تسيبينى ؟ .. عاية تروحيله هو ؟! , ايه بتحبيه ؟؟ , تعرفى ايه عنه عشان تحبيه ؟؟ , هو اكيد مش بيحبك زى ما انا بحبك و ف الاخر عايزة تروحيله و تسيبينى

يصرخ حسن بوجه حسناء و يمسج ذراعها بشدة ثم يتركها و يذهب و يغلق الباب بالمفتاح بعد ان يخرج , ثم تسمع صوت ارتطام الباب .. تجلس حسناء لتبكى و هى لا تعلم تبكى منه ام تبكى عليه

تمر ساعات , و تنام حسناء دون ان تشعر من كثرة البكاء , ياتى حسن الى تلك الشقة و يدخل الى الغرفة التى حبس بها حسناء , يجدها نائمة وهى تجلس بجوار الباب .. يحملها بين ذراعيه و يضعها على السرير

يأتى بحقيبة صغيرة احضرها معه  و يخرج شاشا و قطنا و يمسح الدم من على جبينها , تفتح عيناها و تنظر له و هى لا تقوى على الحراك .. يكمل تضميد الجرح و عيناه مثبته على عيناها

تحاول حسناء الاعتدال فى جلستها فيساعدها و يضع يده اسفل كتفها حتى تستند عليه , يحاول ان يتكلم معها و لكنها ترفض الحديث فقط تنظر اليه ثم تشيح بنظرها الى ناحية اخرى

حسن : انتى كويسة دلوقتى ؟ ..
طيب ردى عليا ؟؟ ..
انا جبت اكل عشان ناكل سوا
 فاكرة لما كنا كل يوم نتغدى سوا و احنا ف الشغل ؟
 انا عايزك تأكلينى بايدك ..
هتفضلى ساكتة كدة طيب ردى عليا ؟

حسناء : مش عايزة آكل ولا عايزة حاجة منك , سيبنى لوحدى لو سمحت

حسن : انتى بتعاقبينى يا روحى ؟ , انتى عارفة انى مش هستحمل اشوفك كدة زعلانة منى ؟

حسناء : طالما مش مستحمل ده سيبنى امشى

حسن : ما تتكلميش كدة تانى ,, انا مش هسيبك تمشى من هنا ابدا .. سامعة ..

يخرج حسن من الغرفة و يغلق الباب خلفه و تنقضى ساعات اخرى

* * * * * * * * 

فى منزل احمد .. احمد و وفاء يجلسان معا

احمد : يا ترى ايه اللى حصلها , انا خايف اوى يا وفاء . خايف عليها اوى

وفاء : ان شاء الله هنلاقيها و هتكون كويسة , ما تقلقش , حسناء قوية و انت عارف كدة

احمد : عارف و محتاجها دلوقتى معايا لان هيا كانت دايما الكلمة اللى بتقوينى و بتخلينى استحمل

يبكى احمد فتقترب منه وفاء لتضمه الى احضانها و و تحاول ان تطمئنه بلمساتها

* * * * * * * * *

فى منزل حسن بالقاهرة .. هالة تنتظر حسن الذى لم يأتى الى المنزل و لم يفتح هاتفه طوال اليوم , فهى فى غاية القلق عليه , تحاول ان تنام بجوار طفلها الرضيع و لكنها لا تستطيع ان تضع حتى رأسها الى الوسادة , لا تعلم ماذا تفعل , فحملت الهاتف و اتصلت بـ ماجد صديق حسن

هالة : الو , ماجد

ماجد : ايوة

هالة : انا هالة مرات حسن .. اسفة انى بتصل ف وقت زى ده , بس مكنتش عارفة اكلم مين غيرك

ماجد : خير يا هالة فى ايه ؟!

هالة : هو حسن عندك ؟

ماجد : لا , بقالى اسبوع ما شوفتهوش اصلا , ايه اللى حصل ؟

هالة : انا مش عارفة عنه حاجة من الصبح , و تليفونه مقفول انا خايفة يكون جراله حاجة

ماجد : طيب انا هحاول اشوفه فين ما تقلقيش ان شاء الله خير , تلاقيه بس سهران مع اى حد من صحابه

هالة : ده نزل من الساعة 6 الصبح و لحد دلوقتى ما اعرفش عنه حاجة ,  انا خايفة اوى

ماجد : طيب هو ما قالش هو رايح فين ؟؟

هالة : لا , و عمره ما نزل بدرى كدة

ماجد : طيب اتطمنى انتى و انا هنزل اشوفه عالقهوة اللى بنقعد عليها

هالة : طيب طمنى اول ما تعرف اى حاجة , معلش بقي هتعبك معايا

ماجد : و لا يهمك يا هالة , انتى عارفة ان حسن يبقي اخويا

يغلق ماجد مع هالة و يتصل على هاتف حسن ولكن يجده مغلق , يغير ملابسة و ينزل و هو يفكر طوال الطريق اين يمكن ان يكون حسن , نظر الى الموبايل مرة اخرى و تذكر التاريخ , انه يوم زواج حسناء , هل من الممكن ان يكون ذهب اليها ؟؟!!

 ** * * * * * * *

تأتى ساعة الفجر , فتخرج حسناء من الغرفة لتجد حسن نائما على الاريكة .. تحاول ان تفتح باب الشقة لتهرب , و لكن يستيقظ حسن و يمسك ذراعها بقوة فتصدر صرخة عالية ......