لا تتركنى #15

الحلقة الخامسة عشر 

**************
كان مراد ونهى فى السيارة و لم يكن الصوت واضحا جدا , بسبب ذلك الهواء المندفع من النافذة ..

نهى : انتا عمرك ما حبيت بجد يا مراد ؟
مراد : ممممممممممم , لا حبيتك ...
نهى : حبيت , مين بقا .؟؟
مراد : حبيتك ..
نهى : ايوة تمام ,, حبيت ,, مين بقى ؟؟
مراد : ااه حبيت .. بحبك انتى يا نهى ...
و تنهيده دون كلام , و صمت يسود تلك اللحظة , كأنها كانت متوقعة ذلك ولكنها كانت تقنع نفسها كثيرا انه لن يقولها ابدا ...
لم تكن تعلم ماذا تفعل , فقد كانت ضربات قلبها متصارعة و اخذ صوت انفاسها تعلو ... 

مراد : طيب التنهيدة دى معناها ايه ؟

نهى : بس يا مراد من فضلك ..

و استمر الصمت حتى و صلا الى منزل نهى ..

مراد : نهى انا مش عارف ردك ايه , بس بلاش اللى انا قولته ده يأثر علينا , انا مش عارف انا قولت كدة ازاى اصلا , بس اعتبرينى ما قولتش حاجة خالص 

نهى : خلاص يا مراد , عادى و لا كأن حاجة حصلت .

مراد : بس انا فعلا بحبك , و مش بكدب عليكى , بس حسيت انى خلاص مش قادر , كان لازم اقولك عن احساسى . 

نهى : مممممم طيب , انا لازم اطلع البيت الوقت اتاخر , عن اذنك . 

                                ------------------------

نهى : بعدها فضلنا كام يوم ما نكلمش بعض اصلا , كان ممكن يكون نوع من الهروب , مكنتش عايزة اصدم نفسى , كان لازم ابعد نفسى .

خالد : طيب انا مش فاهم , طالما كنتى بتحبيه و هوا كان بيحبك , ليه هربتى ؟ 

نهى : تفتكر كان ينفع اصلا ؟؟ , مكنتش عايزاه يعرف اصلا انى بحبه , كان لازم اهرب .

خالد : طيب انتوا كدة من ساعتها ما اتكلمتوش تانى ؟

نهى : لا اتكلمنا للاسف ..

                       -------------------------------

مراد : نهى انتى مالك ؟

نهى : مفيش حاجة , انا كويسة 

مراد : لا انتى ليه بتعاملينى كدة ؟ , كل ده بسبب اللى قلته المرة اللى فاتت ؟؟ 

نهى : لا 

مراد : من ساعتها وانتى متغيرة معايا جدا , انا اسف انى قولت الكلام ده , بس مش عايزه كل ده يأثر علينا . 

نهى : مراد .....

مراد : ايه يا نهى ؟؟ .. قولى 

نهى : ااه .. كل ده بسبب اللى قولته , بس مش دى المشكله ..

مراد : امال ايه المشكله ؟؟

نهى : المشكله ان ..... انى .... عشان انا كمان بحبك ....

و سقطت دموعها بعد تلك الكلمة ..

مراد : طيب ليه اتعاملتى معايا كدة ؟؟ , انا افتكرتك بتكرهينى , رد فعلك كان غريب جداا ..

نهى : عايزنى اعمل ايه ؟؟ , انا عارفة اننا عمرنا ما هنكون لبعض اصلا . 

مراد : مين اللى قال كدة ؟؟ 

نهى : انتا ناسى هدى ؟؟ , خطيبتك .. انا عمرى ما هكون السبب ف انى اجرح حد . 

مراد : انا بحبك انتى , مش انتى كنتى دايما بتقليلى انى لازم اقولها عن حقيقة مشاعرى تجاها , انى ما ينفعش اخدعها , خلاص انا هقولها على حقيقة مشاعرى , اكيد الدنيا عمرها ما تنفع من غير حب زى ما انتى قولتى .

نهى : حتى و سيبتها ده قرارك انتا , بس انا بردو عمرى ما هكون ليك 

مراد : ليه ؟؟ 

نهى : عشان ساعتها هحس بالذنب انك سيبتها عشانى , و انا مش عايزة كدة , خلينا اصحاب احسن , انا مش عايزة اسببلك مشاكل .

مراد : وانتى ؟ 

نهى : انا ايه ؟؟

مراد : انتى مش بتحبينى ؟؟

نهى : بحبك بس افضل انى احبك زى ما انتا كدة , واحنا بعيد عن بعض , خلى قلبى يحتفظ بمشاعره لنفسه , بلاش نعقد العلاقة اللى بينا . 

مراد : ماشى يا نهى , زى ما تحبى , ولا كأننا اتكلمنا ف  حاجة 

نهى : كدة احسن .. يالا انا همشى ..

مراد : استنى هوصلك ..

نهى : لا خليك انا هاخد تاكسى 

مراد : انتى اللى قولتى , ما تخليش اى حاجة تأثر علينا , احنا زى ما احنا .

نهى : طيب , يالا . 

                         ----------------------------

نهى : بس ... و بعد كدة اتعاملنا عادى , اصحاب و بس , ااه كنا قريبين من بعض بس كنت دايما احط حاجز بينا , لانى مكنش ينفع أظهر مشاعرى .

خالد : وكنتى بتقدرى تخبى مشاعرك وانتى معاه ؟؟

نهى : ااه , انا اقوى مما تتخيل , كان لازم اقتل المشاعر اللى جوايا , كان لازم تختفى .

خالد : انتى ليه حبيتيه ؟ , يعنى فى واحدة تحب واحد وهيا ما تعرفش انه بيحبها , او حتى انها تتوقع منه يحبها ؟

نهى : انا مكنتش متوقعة منه اى حاجة اصلا , مكنتش عايزاه يحبنى , كنت فاكرة ف الاول انه اعجاب عشان مفيش واحدة بتحب فعلا حد عمرها ما كلمته , بس لما اتعاملت معاه لقيت نفسى حبيته , بس كنت بحاول اكدب نفسى , وكنت مرتاحة جدا لانى عالاقل شايفاهقدامى , كنت عارفة انه هيبقى كويس . مكنتش عايزة اى حاجة تانية , كنت عايزة اتاكد انه مبسوط عشان كدة كنت دايما بقنعه يحب هدى . 

خالد : يااااه .. انتى طول عمرك كدة ؟؟ .. بتحملى نفسك فوق طاقتك , حتى اللى حبيتيه كنتى عايزه الاحسن ليه , حتى لو مش معاكى . 

نهى : ممممم ...

خالد : طيب وايه اللى حصل بعد كدة ؟؟ 

نهى : قربنا من بعض فترة , كان بيكون محتاجلى جدا . مكنتش اقدر اتأخر عليه لو محتاج لاى مساعدة , كان دايما يقولى انه مش بيرتاح غير معايا , مكنش بيقول لاى حد على اللى تاعبه غيرى انا .. 

خالد : طيب و خطيبته ؟؟ 

نهى : كنت برضو بقنعه انه يحبها ,انه يقرب منها , بس ..

خالد : سيبتوا  بعض ليه ؟؟ 

نهى : قربنا من بعض جدا ...

                             --------------------------

مراد : تعبان يا نهى و عايزك معايا 

نهى : انا معاك اهو ..

مراد : ممكن تنسى كل حاجة ف الدنيا , نعيش اللحظة زى ما بيقولوا , احنا ما نضمنش نعيش لبكرة اصلا , ليه ما نبقاش مع بعض دلوقتى ؟؟

نهى : انتا عايز ايه يا مراد ؟ 

واخذ يدها ليضعها بين قبضتيه ...

مراد : انا بحبك ومش قادر امثل اننا لازم نبعد عن بعض , انا فعلا بحبك , انا هسيب هدى قريب , و عايز اتجوزك انتى ..

نهى : طيب قولى .. انتا ليه من الاول كنت مع هدى ؟؟

مراد : انا قولتلك مش هنكر انى كنت معجب بيها و قولت انا هتجوزها زى ما والدتى عايزة , مكنش لازم احبها , وانا ما حبيتش غيرك انتى .. 

نهى : انا دايما بقول ما تشغلش قلبك بحاجة مش صح عشان لما تقابل اللى المفروض يسكن قلبك يلاقى مكان فيه مش يلاقيه مشغول  . و ده اللى انتا عملته فى نفسك ..

مراد : خلينا ننسى كل حاجة يا نهى , تعالى نفكر ف دلوقتى و بس ...

                          ---------------------

نهى : طبعا الوضع كان صعب , ما اعرفش ازاى نسيت كل حاجة وكنت بحاول ابعد تفكيرى عن بكرة , كأنى مش عايزة اجرح نفسى .

خالد : يعنى كنتوا مع بعض ؟؟

نهى : لفترة صغيرة , مكناش بنفكر ف اى حاجة غير اننا مع بعض , سافر فترة و رجع تانى مصر و كنا بنتكلم مع بعض على النت , لما رجع مصر بعد ما كنا بعدنا عن بعض فترة حسيت انى غلطانة , قالى انه مش هيقدر يظلم هدى لانه ما عملتش اى حاجة وحشة ف حقه ولا لاقى غلطة ليها عشان يسيبها  , و انا كمان كنت شايفة كدة وده اللى خلانا نبعد خالص عن بعض . 

خالد : ومن ساعتها وانتوا ما اتكلمتوش , لحد اليومين اللى فاتوا ؟؟

نهى : مممممممم بالظبط كدة , هوا حاول اننا نتكلم مع بعض تانى , كان بيقولى كتير انه عايز يقولى على حاجة مهمة جدا , بس انا مكنتش عايزة اسمعه , كنت خايفة اضعف تانى .. و من ساعتها ما اتكلمناش , خلصت الكلية و اشتغلت و نسيت الموضوع تمام .. لحد ما .......

خالد : ما ايه ؟؟ .........

                               * * * * * * * * * * * 

تستيقظ دينا , تبعد رأسها قليلاا عن مؤمن , الالم يكاد يفتك برأسها , تذهب الى غرفة نهى , تضع رأسها على السرير و تكتم الآهات التى تصدر منها , فقد كان الالم كالمنشار يقطع فى رأسها ببطئ شديد , او كذلك الجاكوش يضرب فى رأسها فيصدر طنين عالى و قوى جدا يدوم اثره لفترة طويلة .

بعد دقائق استيقظ مؤمن , فقد كانت الساعة السادسة و النصف , بحث عن دينا فلم يجدها بجواره , خرج من الغرفة و اخذ ينظر فى ارجاء الشقة , ثم نادى باسمها , عندما سمعت صوته حاولت ان تمسح دموعها قبل ان تجيب عليه , و بعد لحظات خرجت من الغرفة 

دينا : ايه يا حبيبى , معلش كنت نايمة ..

مؤمن : قلقتينى عليكى اوى , انتى كويسة 

دينا : ااه يا حبيبى تمام , انتا عامل ايه دلوقتى ؟

مؤمن : كويس , بس انتى شكلك تعبانة 

دينا : لا عشان كنت نايمة بس ..

مؤمن : دينا ...

دينا : حبيبى مفيش حاجة .. انا هحضرلك الفطار . 

مؤمن : طيب انا هساعدك ..

تدلف دينا الى المطبخ و تبدأ فى اعداد الفطار و بعد لحظات تقف لتستند بيدها الى الطاولة و تقف و هى فى شدة الالم , و بعد لحظة تصدر صرخة عالية ممزوجة بالالم .....

                                 * * * * * * * * * * 

ياسمينة : انا بكرهك ...

مراد : بتكرهينى ؟؟ !! .. ليه كدة ؟؟

ياسمينة : عشان خليتنى احبك اوووووووى , عشان كدة بكرهك 

مراد : طيب يبقى انا كمان بكرهك , عشان بحبك وما اقدرش استغنى عنك , عشان بقيتى كل حاجة ف حياتى ...

ياسمينة : طيب انا كمان بموت فيك وبعشقك , ربنا يخليك ليا يا روحى 

مراد : الله ... احلى دعوة ف الدنيا , ربنا يخلينا لبعض و يجمعنا سوا بإذن الله ..

ياسمينة : ان شاء الله يا روحى .. 

تبكى يا سمينة و هى فى غرفتها و هى تتذكر كل تلك اللحظات الجميلة التى قضتها مع مراد , تلك الكلمات المترددة بينهم " احبك " و " اعشقك " , فكيف يكون كل ذلك خداعا وكذبا , كيف تصدق انه لها هى فقط و تكتشف غير ذلك ....