ولا فــى الاحـلام #14

الحلقة الرابعة عشر 

~~~~~~~~~~~

و ذهبنا الى كافيه صغير لتناول الافطار ..
حنان : هاه .. ايه الموضوع ..
احمد : حاضر .. اولا انا بس عايزك تفهمى انى مش بخونك .. ودى مش حبيبتى والله .. وانى مش بحب غيرك ..
حنان : امال مين دى ؟
احمد : البنت دى تبقي اختى ...

حنان : اختك ؟؟... ازاى ؟؟... انتا  معندكش اخوات ..

احمد : انا هقولك على كل حاجة .. بس محدش يعرف الكلام ده خالص ...

حنان : اتفضل .. 

احمد : بابا اتجوز فترة قصيرة جداا .. كانت لحظات ضعف بالنسباله ولما فاق منها واكتشف انه ممكن يخسر حياته كلها بسبب الموضوع ده طلقها .. بس اكتشف بعدها انها كانت حامل .. وجابت اسماء .. 

طبعا كل ده فضل مخبى على ماما لانه كان متاكد ان ماما مش هتوافق بحاجة زى دى .. قدر يخبى الموضوع ده وماعرفناش الا من 10 .... لما والدتها توفت .. كان لازم بابا ياخد اسماء 

 ساعتها بس عرفنا ان بابا كان متجوز واحدة تانية وعنده منها بنت .. ماما لما عرفت انه كان متجوز عليها طلبت الطلاق بس وقتها انا اللى اقنعتها انها تنسى حكاية الطلاق دى عالاقل عشانى انا .. وكان خلاص يعنى بابا طلقها وكمان كانت توفت .. 

ماما رفضت اسماء خالص .. كان لسة عندها 9 سنين بس .. 

حنان : و رفضتها ليه ؟؟؟

احمد : لان بابا كان طالب انها تعيش معانا .. بعد ما والدتها ماتت .. كان لازم بابا يتولى امرها .. بس ماما رفضت تماما .. وقتها اخدها خالها تعيش معاه .. 

حنان : وباباك قدر يسيبها .. يعنى هيا بنته زيك بالظبط 

احمد : مفيش قدامه حل تانى .. يا اما يخسر ماما وحياته كلها .ز يا اما يتصرف ويبعد اسماء عن ماما . 

حنان : يعنى هوا مش بيشوفها خالص ؟؟

احمد : لا طبعا بيشوفها على طول بس طبعا ماما ما تعرفش كدة .. يعنى هوا بيحاول يهتم بيها على اد ما يقدر .. وانا كمان بسأل عليها على طول .. دى مهما كان اختى .. واسمها على اسمى .. 

بحاول اعوضها وحدتها .. هيا دلوقتى عندها 19 سنة بس انا حاسس انها وحيدة جداا .. يعنى احنا اوقات بنتقابل صدفة زى ما شوفتى .. 

حنان : ممممممم بس كدة باباك غلطان جداا .. 

احمد : عارف .. كان لازم يهتم بيها اكتر من كدة .. هيا مالهاش ذنب باى حاجة حصلت .. 

حنان : ايوة .. حرام تعيش بعيدة عن والدها وخصوصا انها كمان من غير ام دوقتى 

احمد : والله ما عارف اعمل ايه ؟؟.. ماما مش عايز اى حد يتكلم ف الموضوع ده .. ولو حد جاب السيرة دى قدامها ممكن تبهدل الدنيا

حنان : احمد .. انا اسفة ..

احمد : ما تتاسفيش .. انا اللى المفروض اتاسف .. انا كان المفروض اعرفك عليها اول ما شوفتها .. كان حقك تعملى كدة .. بس بردو كان حقى انك تسمعينى .

حنان : ممم .. انا اسفة انى شكيت فيك .. كان لازم تكون فى ثقة متبادلة بينا و ما نصدقش اى حاجة حتى لو شوفناها بعنينا ..

احمد : خلاص يا روحى انا مش زعلان .. انا بس ما اخدتش بالى وقتها واتعاملت زى كل مرة بشوفها فيها .. متأسف يا قلبي .. 

حنان : طيب ممكن طلب كمان ؟؟

احمد : انتى تؤمرينى .. 

حنان : عايزة اشوف اسماء ..

احمد : تشوفيها !!

حنان : ااه ... عايزة اقابلها واتكلم معاها .. ممكن ؟؟ 

احمد : طبعا .. انا هبقي اكلمها وارتب معاها معاد ونتقابل برة .. 

حنان : تمام .. يالا بقي تعالى وصلنى الكلية احنا نسينا نفسنا وانا كدة مش هلحق المحاضرة التانية كمان 

احمد : حاضر .. يالا بينا .. 

 

ونحن فى الطريق الى الكلية .. 

نظرت الى احمد بعد ان شردت للحظات .. 

حنان : احمد ...

احمد : ايوة يا روحى .؟؟

حنان : هوا انتا ممكن تتجوز عليا ف يوم من الايام ؟؟ 

احمد : ليه بتسألى السؤال دة ؟؟

حنان : يعنى ؟؟.. ممكن تعمل فيا زى ما عمى عمل .. لحظة ضعف مثلا ..

احمد : اكيد .. الشرع محللى اربعة ولا ايه ؟

حنان : نعم ؟؟؟؟ .. والله ؟؟ 

احمد : الله هتعارضى شرع ربنا ؟؟ 

حنان : وتتجوز ليه بقي عليا ؟؟ 

احمد : ههههههههههه الله حقى ...

حنان : كسر حُقك ... 

احمد : والله ؟؟ 

حنان : ايوة .. طبعا ... قال تتجوز عليا قال ؟؟

احمد : مش لما اتجوزك الاول ؟؟

حنان : يعنى عايزنى استنى لما نتجوز عشان تتجوز عليا ؟ 

احمد : ايوة ..

وبعد لحظات من العصبية المفرطة من جانبى .. والضحك الهستيرى من جانب احمد .. 

توقفت السيارة عند مدخل الكلية .. 

وكنت اهمّ بالانصراف عنه .. امسك يدى .. 

ونظر فى عينى وقال بصوت عذب .. 

احمد : حنان ..

حنان : .........

احمد : انا عمرى ف يوم ما هبص لغيرك .. وعمرى ما هبعد عنك .. انتى كل اللى انا بتمناه من الدنيا ..

حنان : يا سلام ؟؟؟ 

احمد : طيب هقدر ازاى ابص لغيرك وانتى اسّرتى كل حاجة فيا .. كل حاجة بقت معاكى انتى .. قلبى وعقلى وروحى ...

بذمتك هعرف احب اى واحدة تانى وقلبى معاكى ؟...

حد بيعيش من غير قلبه وروحه .. انا عايش طول ما انا قريب منك ..

ونظرت اليه فى خجل شديد وابتسامة رقيقة ..

حنان :انا بحبك اووى يا احمد .. اوعا ف يوم تفكر تبعد عنى .. انا ما صدقت لقيتك .. انتا كل اللى بتمناه من الدنيا دى ..د

احمد : ربنا يخليكى ليا يا روحى .. ويقدرنى اسعدك طول ما انا عايش ..

حنان : ربنا يخليك ليا يا حبيبى ..

احمد : يااااااه .. الواحد يزعلك كل يوم عشان يسمع الكلام الحلو ده .. 

حنان : احم ... يالا بقي يا دكتور .. روح على شغلك وانا كمان هروح بقي الحق المحاضرة 

احمد : مااشى .. خليكى انتى بتهربى كدة كل مرة 

حنان : ايوة بقي .. يالا سلام .. 

احمد : طيب سلام يا روحى .. خدى بالك من نفسك 

حنان : حاضر ... وانتا كمان ..

احمد : حاضر ...

اعود فى ذلك اليوم الى المنزل وانا متعبة جدااا ..

ابدأ فى المذاكرة حتى الساعة التاسعة .. 

القى نفسى على السرير .. واتصل بأحمد ..

احمد : الو ..

حنان :الو .....

احمد : عاملة ايه يا روحى ؟؟ 

حنان : الحمدلله .. انتا عامل ايه ؟

احمد : تمام .. ايه ؟؟.. شكلك كدة هتنامى ؟؟

حنان : يعنى شوية .. لسة ورايا حاجات كتير .. بس قولت اريح شوية تعبت جداا 

احمد : الف سلامة عليكى يا قلبي ..

حنان : الله يسلمك يا حبيبى .. انتا روحت ولا لسة ؟

احمد : يعنى .. شوية كدة وهروح ..

حنان : تمام .. خد بالك من نفسك .. لما توصل كلمنى ماشي ؟

احمد : حاضر .. وانتى لو تعبتى نامى .. الدكتور قال لازم ترتاحى  وتنامى كويس .. عشان ما يأثرش عليكى .. ماشى ؟

حنان : حاضر يا حبيبى ..

وبعدها اصبحت كمن فقد الوعى .. 

نمت ولم اشعر باى شئ سوى فى الصباح .. وكنت قد وجدت اتصالات عديدة من احمد ..

انتظرت حتى السابعة واتصلت به .. 

احمد : الو ..

حنان : الو .. صباح الخير 

احمد : صباح النور .. عاملة ايه يا روحى ؟

حنان : الحمدلله .. معلش امبارح نمت والله وما حستش بنفسى خالص ..

احمد : ولا يهمك يا روحى .. انتى جهزتى عشان الكلية ؟؟

حنان : ااه .. هنزل كمان شوية ..

احمد : طيب يا روحى انا هعدى عليكى ..

حنان : لا .. خليك انا هروح لوحدى .. مش عايزة اتعبك يا قلبى ..

احمد : بس انا اللى عايز اجى اوصلك .. دى بتكون فرصتى الوحيدة انى اشوفك .. 

حنان : معلش خليها يوم تانى .. يوم الجمعة ان شاء الله نبقي نخرج سوا ماشي ؟؟...انا هنزل دلوقتى وهقابل غادة .. ولكما اخلص كلية هكلمك ..

احمد : ماشى .. خدى بالك من نفسك ..

حنان : حاضر ..سلام 

وبعد يومين لم يتغير بهم شئ .. 

اتصل  بى احمد وكان قد حدد موعد مع اخته لنقابلها .. 

وذهبت فى اليوم التالى بعد الجامعة لمقابلتها والتحدث معها ..

واصطحبنى احمد اليها ..

وعندما وصلنا ..............

يتبع ..

يا رب تعجبكوا ..