ولا فـى الاحـلام #24

الحلقة الرابعة والعشرون

~~~~~~~~~~~~~~
وانتهى ذلك اليوم .. وذهبنا فى السيارات ..
كنت انا مع احمد فى السيارة ..
والبنات ذهبن مع اصدقاء احمد فى سيارتهم ..
ونحن فى الطريق ...

احمد : حبيبة قلبى مبسوطة ؟
حنان : ممم طبعا مبسوطة ... كفاية انى مع حبيبى .
احمد : ربنا يقدرنى واسعدك كدة على طول ..
حنان : يا رب يا حبيبى .. انتا هتنزل المستشفى بكرة ؟
احمد : المفروض ...
حنان : المفروض ؟؟.. يعنى ايه ؟؟
احمد : بفكر ما انزلش بكرة ..
حنان : يا سلام ؟.. لا انتا الفترة اللى فاتت دى اخدت اجازات كتير .. لازم تهتم شوية بشغلك .. ولا ايه ؟
احمد : حاضر . . من عنيا .. انتى هتعملى ايه بكرة ؟؟
حنان : مش عارفة ..
احمد : طيب ما تيجى بكرة ننزل ......
حنان : لا ننزل فين ؟؟... احنا مش قلنا هنهتم بالشغل بقي شوية ..
احمد : طيب بكرة بس ..
حنان : لا ... بكرة هتنزل المستشفى وبليل تروح العيادة .. ماشى ؟
احمد : حاضر .. يعنى مش هشوفك بكرة ؟
حنان : لا ... انتا يوم الاجازة ان شاء الله تيجى تقضيه معايا ماشى ؟
احمد : ياااه يوم الاجازة .. لسة فاضل خمس ايام .. مش هشوفك كل المدة دى بردو ؟
حنان : ايوة ..
احمد : انتى بتعاقبينى يعنى ؟؟
حنان : لا يا روحى وانا اقدر ؟؟
احمد : ماشى يا نونا .. هعمل ايه ؟.. مضطر اسمع الكلام ..
حنان : ايوة كدة .. شاطر ..
احمد : المهم الجميل يبقي راضى عننا بس .. 

ووصلنا الى منزلى ..
وكنت افتح الباب لانزل من السيارة .. ومسك احمد يدى ..
احمد : ايه ده هتنزلى على طول كدة ؟؟
حنان : ااه .. فى حاجة تانية ولا ايه ؟؟
احمد : طيب مفيش مع السلامة ؟
حنان : طيب يا سيدى مع السلامة ..
احمد : استنى ..
وسحب يدى .. واقترب منى حتى طبع قبلة على خدى ..
احمد : هتوحشينى اووى يا عمرى
حنان ( بتوتر ) : .. ممممم .. انا هنزل بقي .. تصبح على خير
احمد : وانتى من اهله ... هكلمك لما اوصل
حنان : ماشى ...
وذهب احمد .. واتصل بى بعد ان وصل الى المنزل .. وتحدثنا قليلا واجبرته على النوم حتى يستيقظ مبكرا للذهاب الى عمله ..

وفى اليوم التالى .. اتصلت بىّ اسماء واخبرتنى انها ستقابلنى عند منزلى حتى تاخذ اغراضها التى تركتها عندى ..
واخبرتها ان تقضى اليوم معى ..
وجاءت وتحدثنا طويلا ..

اسماء : بس شكله كويس جدا .. واللى مطمنى انه صاحب احمد ..
حنان : طيب هوا قالك ايه ؟
اسماء : هوا اتكلم معايا .. وسألنى عن حاجات كتير جدا عنى .. اول مرة حد يتكلم معايا كدة ..
حنان : يعنى انتى معجبة بيه ؟؟
اسماء : ااه .. مش عارفة
حنان : يعنى ايه مش عارفة. .. انتى حاسة بايه ؟؟
اسماء : حاسة انى عايزة اتكلم معاه تانى .. يعنى هوا اخد رقمى وكدة ..
حنان : طيب هوا اتصل بيكى ؟؟
اسماء : لسة ...
حنان : هوا انهى واحد فيهم ده ؟؟
اسماء : اسمه مدحت .. وبيشتغل ف الشركة هوا وعمه ..ووالده متوفى .. و مفيش غيره يعنى وحيد .. عايش مع والدته ..
حنان : حيلك حيلك .. كل ده عرفتيه امبارح ؟؟
اسماء : ايوة .. احنا طول اليوم بنتكلم امبارح ..
حنان : هوا قالك ايه بالظبط ؟؟.. يعنى قال انه معجب بيكى مثلا ؟
اسماء : مش عارفة ؟؟..
حنان : ازاى يعنى ؟؟ .. مين اللى هيعرف
اسماء : ما انا اول مرة اكلم حد كدة ومش فاهمة هوا يقصد ايه ؟؟.. يعنى ممكن يكون لمح لكدة بس انا مش فهمت ..
حنان : مممم طيب براحة كدة .. مثلا ممكن يكون قال انك حد مختلف .. او انه اول مرة يحس الاحساس ده .. او انه عايز يتكلم معاكى تانى
اسماء : ااه قال كل ده .. يبقي ايه ؟
حنان : بصى ..هوا كدة ممكن يكون فعلا معجب بيكى . بس اصبرى بردو .. الله اعلم هوا يقصد ايه ؟؟
اسماء : يعنى ايه ؟؟
حنان : لا ما تقلقيش .؟.. ده صاحب اخوكى وعمره ما هيضحك عليكى .. واحمد قالى انهم اصدقاء الطفولة واكتر من الاخوات ..
اسماء : يعنى لو كلمنى اكلمه عادى ؟؟
حنان : ااه .. اتكلمى معاه عادى .. بس مش اووى يعنى ..
اسماء : لا انتى كدة حيرتينى خالص .. يعنى اعمل ايه ؟؟
حنان : اتكلمى معاه عادى بس ما تحسسيهوش انك معجبه بيه الا لما تتاكدى منه الاول ..
اسماء : طيب ..
حنان : المهم .. ماما هدى عاملة ايه معاكى ؟؟
اسماء : لا كويسة جدا الحمدلله .. مكنتش متوقعة انها تعاملنى كدة .. دى بتعاملنى زى بنتها .. ولما بتكلمنى بفتكر ماما بالظبط ..
حنان : الحمدلله ... ربنا يسعدك ..
اسماء : يا رب ..
بعد ان ذهبت اسماء .. اتصلت باحمد وكان فى طريقه للعيادة ..
حنان : الو ..
احمد : الو .. حبيبة قلبى .. وحشتينى
حنان : انتا وحشتنى اكتر .. عامل ايه ؟
احمد : الحمدلله .. انتى عاملة ايه ؟؟
حنان : تمام .. الحمدلله ..
احمد : ايه كنتى بتعملى ايه ؟؟
حنان : ولا حاجة .. اسماء كانت عندى ولسة ماشية
احمد : اسماء كانت عندك ؟.. ليه فى حاجة ؟
حنان : لا .. كانت ناسية حاجات عندى وجت تاخدها واهى تسلينى شوية ..
احمد : مممم طيب كويس انها خرجت من وحدتها دى ..
حنان : ااه كويس ..المهم بقي انا مش هعطلك .. انتا وصلت فين دلوقتى ؟
احمد : خلاص انا وصلت اهو العيادة ...
حنان : طيب يا روحى .. خلص بقي شغلك وكلمنى لما تروح ماشى
احمد : حاضر .. مع السلامة يا قلبى ..
حنان : سلام يا عمرى ...

وانتهى ذلك اليوم ..
وكانت الايام تمر متشابهة جداا .. واجمل ما فيها هى مكالماتى مع احمد

مكالمة مع احمد فى الصباح .. ثم وهو فى طريقه الى العيادة .. ثم فى المساء مكالمة قصيرة حتى ينام احمد قبل ان نقفل الخط ..

و فى يوم الخميس اتصلت بى غادة وقالت انها تريدنى لن اقابلها لموضوع مهم ..
ونزلت لاقابلها ..

وبعد ان تحدثنا عن الامور العادية والسؤال عن الحال وكل شئ ..
غادة : حون عايزة اسألك على حاجة ؟؟
حنان : حاجة ايه ؟؟
غادة : انتى تعرفى يوسف ؟؟ حنان : يوسف مين ؟؟ 
غادة : صاحب احمد ..
حنان : ماله يوسف ؟
غادة : هوا كويس ؟؟.. يعنى انتى تعرفيه ؟؟
حنان : لا هوا انا مش اعرفه .. ما اتعاملتش معاه غير مرة واحدة بس.. بس احمد كلمنى عنه يعنى .. بس اشمعنى بقي ؟؟

غادة : اصله عايز يرتبط بيا ..
حنان : ايه؟؟.. انت كمان ؟؟..
غادة : انا كمان ايه ؟؟ ... هوا عايز يرتبط بحد تانى ولا ايه ؟؟
حنان : لا مش قصدى .. المهم كملى .. قالك ايه ؟؟
غادة : ممممم اتكلمنا مع بعض يوم كتب الكتاب .. وصراحة يعنى الواد حلو و مهندس .. يعنى كامل من مجميعه
حنان : المهم يعى هوا قالك انه معجب بيكى ؟؟
غادة : لا ......
حنان : لا .. و مصدعانى من بدرى

يتبع ..يا رب تعجبكوا ..