زوجين .. ولكن ( الحلقة الرابعة )

الحلقة الرابعة

احمد واميرة قاعدين بعد الخطوبة ف كافيه ومعاهم سارة وخطيبها ( مازن ) وحسام وغادة

كل اتنين فيهم علي طرابيزة

احمد "ممكن بقي نتكلم "

اميرة " عايز تعرف ايه يا احمد ؟؟ "

"كل حاجة يا اميرة .. انتي امبارح قلتيلي اننا هنتكلم ف كل حاجة بعد الخطوبة وهتحكيلي كل حاجة عن حياتك"

" طيب انتا قول عايز تعرف ايه وانا هجاوبك "

" عايز اسمع انتي هتقولي ايه ... وليه كرهتي الحب كدة ؟؟ "

" حاضر يا احمد .....هحكيلك كل حاجة من اول ما عرفت وليد......انا قابلت وليد من حوالي 8 سنين  كنا قريبين اوي من بعض حبينا بعض .. استغربت اول مرة لما فضل يتكلم معايا عن حياته الخاصه واحلامه وطموحاته اللي كانت دايما كبيرة اوي .. كان اوقات كتير مش راضي باللي معاه... اتخطبنا بعد قصة حب وكنا مبسوطين جداا .. كانت سفرياته كتير اوي كان نفسه يشتغل بره مصر ..كان بيحاول باي طريقة انه يسافر ...قبل الفرح بشهرين سافر (برلين ) وقالي انه كان في مسابقة لمصممين الديكور وانه هيسافر وسألني لو ينفع اسافر معاه واشترك انا كمان ف المسابقة ............"

"سكتي ليه ؟؟؟ ....كملي ... انتي سافرتي معاه؟؟ "

"لا كنت عارفة ان بابا مش هيوافق...المهم انه سافر وبعدها ب3 ايام .. بابا قالي اسافر المسابقة دي وانه نفسه اني انجح فيها...سافرت بعدها وقلت اعمل لوليد مفاجأة .. وما اتصلتش بيه ولا قلتله اني مسافرة............"

" يعني انتي سافرتي برلين وانتوا لسة مخطوبين؟؟ "

" ااه ولما وصلت الفندق سالت عليه .....بس ......"

"بس ايه ؟؟؟!! "

" رد عليا عامل الريسيبشن ان وليد ومراته نازلين ف الاوضة رقم 602 ...."

دمعت عين اميرة  بس كانت بتحاول تتمالك اعصابها

احمد " مراته ؟؟!!! ...ازاي ؟؟ "

" انا بردو اتصدمت كدة سالت تاني يمكن يكون غلطان ف اسمه ولا حاجة ... بس قالي انه هو شخص واحد اسمه وليد من وصر ومشترك ف مسابقة (The Best Designer ) .. انا وقتها اتشليت ما قدرتش انطق لا اتحرك ... وكانت دموعي صامته جداا ... ووقتها كان هو نازل وشافني .....شفته ومعاه واحدة شكلها اجنبية ... طبعا وقتها معرفش يعمل ايه ..جري عليا ومسك ايدي وقالي انه مستعد يشرحلي كل حاجة....... اتمنيت انه يكدب عليا ويقولي ان الكلام ده مش حقيقي ........ "

" وسمعتيله بعد ما اعترف انه فعلا متجوز ؟ "

" كان لازم اسمع تفسيره وحجته كانت  ضعيفة اووي ............

--------------------------

وليد " يا اميرة صدقيني انا مش قصدي اجرحك .. بس انا عملت كل ده عشانك انتي ... "

اميرة " والله اتجوزت عشاني انا ؟؟ ... وكدبت عليا عشاني انا بردو !! "

" ااه عشانك يا اميرة ..كان نفسي نكون مبسوطين وكان نفسي اجيبلك كل اللي انتي عايزاه.. بس انتي عارفة الشغل ف مصر عامل ازاي ..... انا وجولي اتقابلنا ف شرم الشيخ السنة اللي فاتت و هي اللي جت وكلمتني و......"

" وانتا حبيتها ... "

"لا يا اميرة انا ماحبتش ولا هحب حد غيرك ....... جولي قربت مني اوي ولقيتها بتطلب مني اننا نتجوز ... انا استغربت لاني كنت بتعامل معاها عادي جدا...... وقبل ما اقبل او ارفض لقيتها بتقولي انها مستعدة تفتحلي مكتب استثمار كبير هنا ف برلين واني اوافق اتجوزها بس ....انا استغربت جدا ليه هي بتطلب مني كدة .. قالتلي انها مش عايزة تتجوز للاستقرار ..وانها عايزة بس ان اهلها يبعدوا عنها ويبطلوا يسالوها عن حياتها ..."

" وانت بعت نفسك عشان الفلوس ....... ملعون ابو الفلوس اللي تعمل ف الواحد كدة ..... اللي تخليه يجرح ويقسي علي الناس .. يكدب عليهم ويخدعهم ........خلاص يا وليد انا كنت بحاول اصدق ان ليك مبرر يخليك تعمل كدة بس ..انا اسفة دبلتك اهي ما تحاولش تسال عني تاني ومش عايزة اشوفك تاني.....اخرج من حياتي "

------------------------------

اميرة " وقتها انا رجعت علي مصر .. .. ولا كنت بكلم حد ولا باكل ولا بشرب .. صدمتي فيه كانت كبيرة اوي .....ازاي قدر يجرحني كدة ؟؟ "

احمد " ودخلتي المستشفي ؟؟ "

" ااه ... جالي انهيار عصبي واتحجزت ف المستشفي اسبوعين ....بابا طبعا وقتها قال لباباك علي اللي حصل"

---------------------

سارة " ايه يا اميرة مش كفاية كدة .. الساعة 12 احنا اتاخرنا اوي "

احمد " خلينا كمان شوية وانا هوصلكوا وممكن اكلم عمي واقوله "

سارة " ايه يا احمد من اولها كدة هنتاخر برة البيت وبعدين كلها اقل من شهرين وتتجوزوا .وابقوا اسهروا برة واتاخروا براحتكوا "

احمد " الله ما انتي معاكي خطيبك ..مش عايزة تقعدي معاه ولا ايه ؟ "

سارة " طيب ماشي ..ربع ساعة بس وهنمشي"

احمد "شكرا جدا علي كرمك ده "

----------------------------

احمد " كملي يا اميرة "

اميرة " خلاص مفيش حاجة تانية ممكن تتقال ... بعدها انا كرهت كل الرجالة كنت دايما بشوفهم كدابين وغشاشين ... مش عارفة ازاي هما ممثلين مبدعين كدة ...مسحت كلمة حب من حياتي كلها ووعدت قلبي اني مش هسمح لحد يجرحه تاني"

"بس مش كل الناس زي بعضها يا اميرة .. اكيد زي ما في الوحش في الكويس .. ولا ايه ؟ "

" مش فارقة كتير ... كلهم زي بعض "

" كلهم .. طيب كويس انك ماقلتيش كلكوا "

ابتسمت اميرة لانها كانت بتحاول تداري دموعها وحزنها اللي جواها لما افتكرت وليد "

----------------------------------------

كانت الايام بتجري بسرعة وكان فاضل حوالي اسبوعين علي الفرح

احمد واميرة معظم الوقت مع بعض ومهما حاولت اميرة انها تتهرب من النزول الا انها كانت ف الاخر بتنزل

يوم بيخلصوا الشقة ويوم العفش ويوم فستان الفرح ويوم القاعة وايام كتير كلها زي بعض بالنسبة لاميرة ... وبالنسبة لاحمد هي اجمل ايام حياته لانه كان دايما مع اميرة

------------------------

سهي " اميرة ؟؟؟ .....عاملة يا اميرة ؟؟ ......عاش من شافك "

اميرة " الحمدلله .. انتي عاملة ايه يا سهي وايه اخبارك؟؟ "

" ااه تمام ...انتي الي ايه اخبارك والله وحشتني ايام الكلية والمذاكرة "

" ااه كانت اجمل ايام ... الله ابنك ده ؟؟ "

" اه ابني ..عمر ...انتي اتجوزتي ولا لسه ؟؟ "

" لسة فرحي كمان 10 ايام ... وانتي اكيد جاية الفرح "

" ان شاء الله .... يااه و وليد عامل ايه تلاقيه هيطير من الفرحة "

"....... اااااا ... وليد ؟؟ ..."

" في ايه يا اميرة ..انتي زعلتي ليه .. انا قلت حاجة تضايقك ؟؟ "

"لا .. بس انا ووليد سبنا بعض من زمان انا هتجوز واحد تاني اسمه احمد "

" ايه ؟؟ .... انا اسفة .... بس الف مبروك يا اميرة ... هو ايه اللي حصل ؟ "

" الله يبارك فيكي .... عادي محصلش نصيب بينا وسيبنا بعض "

" ممم معلش يا اميرة .. بس ان شاء الله ربنا يعوضك خير واهو الحمدلله رزقك باحمد صح ؟ "

" ااه الحمدلله "

--------------------------------

احمد " الو .. اميرة ..عاملة ايه ...انا االحمدلله ... ايه ؟ ...نازلة امتي ؟ ...طيب خلاص خلصي تمرين وهعدي عليكي نتغدا سوا ...لا مش مشغول .........خلاصماشي نتقابل ف النادي ...مع السلامة يا روحي "

------------------

اميرة ف النادي فجاة لقت حد بيحط ايده علي كتفها

دورت وشها بسرعة

اميرة " ولــــيـــــد !!!! ؟؟؟؟؟ "

وليد " وحشتيني اووي يا ميرو "

" انتا بتعمل ايه هنا ؟؟؟ "

" وحشتيني اووي .. ايه مفيش وحشتني يا وليد ؟ "
" عن اذنك يا وليد ويا ريت تبعد عني  "

" اميرة استني انا عايز اتكلم معاكي "

" مفيش بينا كلام "

" ايه مستعجلة اوي عشان تروحي ل (سي احمد)  بتاعك ؟ "

" ايه !!! ؟؟؟ ..... انتا مالك ؟؟  وبعدين انتا عرفت منين اصلا ؟ "

" انا عارف عنك كل حاجة يا اميرة ... اميرة انا بحبك وعايز نرجع لبعض "
" وليد ..انتا فاكر ايه هترجعلي وتقولي بحبك وانا المفروض اترمي ف حضنك واعيط واقولك مش زعلانة منك عشان بحبك ؟؟ "
" اميرة انا بجد بحبك وماحبتش غيرك ... انا طلقت جولي بعد ما انتي سافرتي علي طول .. حاولت ارجعلك ومعرفتش خالص .. بعدتي عني اوي .. ما حاولتيش تسامحيني علي اول غلطة ليا"
" وليد من فضلك كل حاجة انتهت ويا ريت تمشي بقي عشان خطيبي علي وصول وانا مش عايزة مشاكل "
" ايه نسيتيني بسرعة وحبيبتي غيري .... "
"وليد من فضلك ابعد عني مفيش ليك مكان ف قلبي اني اكرهك حتي "

كانت اميرة ماشية ووليد حاول يوقفها

ف اللحظة دي وصل احمد وشافها وهي بتحاول تبعد عن وليد وهو اللي معترض طريقها

معلش بقي المشكلة دي هي اللي اخرتني :) 
يا رب تعجبكوا